कार्बि आंलं, 3 आगष्ट, 2022: आसाम पुलिसनि मोनसे गेदेर जाफुंसारनाय । आसाम पुलिसआ मंगलबारखालि गुबुन गुबुन रोखोमनि ड्राग्स बोखांनो हादों । जायनि बेसेनखौ माहारियारि हाथाइयाव 15 कौटि रां होनना मिथिनो मोन्नाय जादों । बेजों लोगोसेनो बे ड्राग्सनि फालांगि खालामनायाव लोब्बा गोनां सा 3 सुबुंफोरखौबो आसाम पुलिसआ खाबाय । सासे सेनियर पुलिस अफिसारआ बुंथिना होनाय बादिब्ला, हमजानाय सा 3 सुबुंफोरा बै ड्राग्सफोरखौ मणिपुरनिफ्राय लाबोनानै सोनाब बंगनि सिलिगुरिसिम लांनो नाजादोंमोन । नाथाय बिसोरनि बे नाजानाया जाफुंसारनो हायाखै । मंगलबारखालि फुंनि समावनो दिल्लाइ पुलिस थानानि बेन्दोंआव थानाय मोनसे जायगानिफ्राय बिसोरखौ हमनो हायो । PTI, नि गेजेरजों बुंथिनाय बादिब्ला, स्रोद सुलुं मोननायनि उनावनो पुलिसनि हानजाया सिग्रोमनाय हाबाफारिखौ जागायजेन्दों । बेनि उनावनो पुलिस हान्जाया गारिजों लोगोसेनो सा 3 ड्राग्स फालांगिरिखौ हमनो हायो । जेराव गुबुन गुबुन रोखोमनि गोबां ड्राग्सफोरखौ बोखांनो हायो ।
- 380 ग्राम हेरइन,
- 1 किलग्राम मरफिन आरो
- 2 किलग्राम मेथामफेतामिन
खौ पुलिसनि हानजाया बोखांनो हादों । बै ड्रागसफोरनि बेसेना माहारियारि हाथाइयाव 15 कौटि रां होनना अफिसारआ बुंथिबावो ।
