गोदान दिल्ली,3 जुलाइ 2022: UPSC नि सिबिल सार्बिस आनजादखौ गोब्राब आनजादफोरनि गेजेराव मोनसे मानिनानै लानाय जायो। बोसोरफ्रामबो बे आनजादखौ गोबां फरायसाफोरा होयो। नाथाय माखासे फरायसाफोराल’ बे आनजादआव जाफुंसारनो हायो। बे आनजादनि गेजेरजों हादताव IAS, IPS, IFS आरो IRS खौ सायख’नाय जायो। बे आनजादाव टप रेंकिं मोननो हानायनो IAS रेंकिंखौ होनाय जायो। नाथाय UPSC नि आनजादा माब्ला जाजेनामोन आरो भारतनि गिबि IAS बिबानगिरिआ सोरमोन? बे बाथ्राखौ मोनथिगौ नामा?
UPSC नि अफिसियेल वेबसाइटनि बायदिब्ला ,भारताव सिबिल सार्बिसनि आनजादखौ 1854 माइथायाव इंराजफोरा खुंजेनदोंमोन। संसदनि सेलेक्ट कमेटीनि लर्ड मेकालेनि रिपर्टनि उनाव सिबिल सार्बिसनि आनजादखौ खुंनाय जादोंमोन। बेनि सिगां सिबिल सार्भेन्टनि आनजादनि सेलेक्सनखौ इस्ट इन्डिया कम्पानिनि बिथोनगिरिनि गेजेरजों खालामनाय जायोमोन आरो बिसोरखौ ट्रेनिंनि थाखाय लन्डननि हेलिबरि कलेजाव दैथायहरनाय जायोमोन। बेनि उनाव भारताव पष्टिं खालामनाय जायोमोन।
1854 माइथायाव सिबिल सार्बिस आयगखौ गायसननायनि उनाव 1855 माइथायाव गिबि खेब बे आनजादखौ लन्डनआव खुंनाय जादोंमोन।बे आनजादनि थाखाय मिनियाम बैसोआ 18 बोसोरमोन आरो मेक्सिमाम बैसोआ 23 बोसोरमोन।बै समाव भारतारिफोरनि थाखाय बे आनजादखौ होनाया गोब्राबमोन।
भारतनि Satyendranath Tagore आ 1863 माइथायाव सिबिल सार्बिस आनजादाव जाफुंसारनो हानानै IAS Officer जादोंमोन। Satyendranath Tagore आ Rabindranath Tagore नि गिदिर बिदामोन। Satyendranath Tagore आ भारतनि गिबि IAS Officer मोन।
सिबिल सार्बिस आनजादखौ थियारि खालामनो थाखाय Satyendranath Tagore आ 1862 माइथायाव इंलेन्डआव थांदोंमोन।1 बोसोर थियारि खालामनायनि उनाव बिखौ 1863 माइथायाव सिबिल सार्बिस आनजादनि थाखाय सायख’नाय जायो।बेनि उनाव बियो से बोसोर इंग्लेन्डआवनो गावनि ट्रेनिं लानायखौ फुरा खालामो आरो 1864 माइथायाव भारतआव फैफिनयो। भारताव फैफिननायनि उनाव Satyendranath Tagore खौ बम्बे प्रेसिडेन्सियान थिसनयो आरो माखासे दाननि उनावनो बिखौ आहमदाबाद सहराव दैथायहरनाय जायो। IAS Officer जानाय समाव बिनि बैसोआ 21 बोसोरल’मोन।
