तामुलपुर जिल्लानि सिङाव थानाय 3 नं गरेस्वर हालामनि थागिबि मनरन्जन बर’नि नायल’-जाल’ सासेल’ अनसुलि फिसाजो अजन्ता बर’आ थांनाय बृहस्पतिबार खालि बेलासिनि 1:00 रिंगासोआव न’ सिङाव गोदोनायाव दौलें आलायना जिउ फोजोबनानै लायो। थांनाय 2015 मायथाइआव एबसुनि बान्जायनायाव खुंफुंजानाय TALENT SEARCH आन्जादआव नैथि मासि मोननो हानाय, 2016 मायथाइनि मेट्रिक आन्जादआव 93.66 जौखोन्दो नाम्बार लानानै सेथि मासियाव उथ्रिनो हानाय, गोजौसिन फरायसालिनि आन्जादखौ Barama Pioneer Academy निफ्राय 82 जौखोन्दो मासि लानानै सेथि मासियाव उथ्रिनो हानाय आरो गौहाटी कटन मुलुगसोलोंसालियाव सानखान्थि मेजर लानानै फरायगासिनो थानाय 5थि सेमिस्टारनि फरायसुलिमोन अजन्ता बर’आ।

मख’नो गोनांदि 2017 मायथाइआव कमल कुमार ब्रह्म देरहासात बान्थाखौबो मोननो हादोंमोन अजन्ता बर’आ। नाथाय दुखुनांथाव बाथ्रादि बिथांनि जिउ फोजोबनानै लानायनि गुबै जाहोनखौ दासिमाव रोखा मिथिनो मोन्नाय जायाखै।