गुवाहाटी, 24 जुन 2022: आसामाव माखासे सान सिगां गोब्राब अखा हाबाय थानायनि जाहोनाव सुबुंफोरा दैबानाजों लोमसावजानानै गोबां जेंनाजों मोगा-मोगि जांनांदों । दैबाना आरो हा गिसिखानायनि जाहोनाव गोबां सुबुंफोरा गावनि जिउखौ खोमानानै लानो गोनां जादों । न’-बां, आबाद, जिब-जुनारफोर आरो लामानि दालांफोरा खहा जानायजों लोगोसेनो सुबुंफोरा गाव-गावनि न’खौ गारनानै रैखाथि बादाफोराव थाहैनो गोनां जादों । जानाय-थानाय गासैबो बिथिङावनो जोबोद जेंना नुजाथिदों ।
बेबायदि जेंनाफोरखौ नुनो मोननानै टिबेटनि धोरोमारि दैदेनगिरि DALAI LAMA आ आसामनि दैबानानि जेंनायाव मदद होनो थाखाय बृहस्पतीबारखालि 10 लाख रां अनसुंथाइ हरदों । आसामनि गिबि मन्थ्रि हिमन्त बिस्व सर्मानिसिम बियो गांसे लाइजाम लिरहरदों । जेराव बियो मिथिंगायारि जाथाइ दैबानाजों जिउ गोमानांनाय सुबुंफोरजों लोगोसे थागिबि सुबुंफोरनि धोन-सम्पथि खहा जानांनायाव दुखु मोननाय फोरयहरदों ।
बेजों लोगोसेनो टिबेटनि दैदेनगिरिआ आसामाव दैबानाजों थाबथानानै थानाय सुबुंफोरखौ रैखा खालामनाय आरो बिसोरखौ रैखाथि बादाफोराव दोननाय हाबाफोरखौ बाख्नायदों । जेंनायाव गोग्लैनाय सुबुंफोरखौ 10 लाख रां अनसुंथाइ हरनानै मदद खालामो टिबेटनि दैदेनगिरि DALAI LAMA या ।
आसामनि गिबि मन्थ्रि हिमन्त बिस्व सर्माआ DALAI LAMA नि मदद खालामनायाव टुइटारनि गेजेरजों गोजोननाय बावहरदों |
