गोदान दिल्ली,14 आगस्ट 2022: भारतआ गोबां जौगाखांबाय।नाथाय दासिमबो सुवा सुथि सानाया जोबनानै थाङाखै।बेबायदिनो जाथाया नुजाथिदों राजस्ताननि जालौर जिल्लानि सायला थाना ओनसोलनि सुराना गामिआव ।
सुराना गामिआव गंसे सरस्वती विद्या मन्दिर स्कुल दं।बे स्कुला प्राइभेट स्कुल। बे स्कुलाव 9 बोसोरनि दलित फरायसाआ थाम थाखोआव फरायोमोन।बिनि मुङा इन्द्र कुमारमोन। इन्द्र कुमारा थांनाय 20 जुलाइआव स्कुलाव सोलोंथाय लानो थांदोंमोन।बे समाव बियो गोबां गरम जानायनि जाहोनाव दै गांदोंमोन।दै गांनानै बियो हानि दैहुआव दोननाय दैखौ गिलासआव हाननानै लोङो।
भारताव दासिमबो दलितफोरखै सुवा साननानै लानाय जायो।बेनि थाखाय दलित फरायसाआ हानि दैहुनिफ्राय दै हाननानै लोंनायाव फोरोंगिरिआ छेल सिंआ रागा जोङो।फोरोंगिरिआ दलित फरायसा इन्द्र कुमारखौ खाथिआव लेंहरनानै गाज्रि रोखोमै रायो आरो बुयो।
जायनि जाहोनाव इन्द्र कुमारनि आगदानि खोमा आरो मेगननि सिङाव गाज्रि ऱोखोमै जोखोम जायो।सिगाङाव बिफाआ इऩ्द्र कुमारखौ एसेल जोखोम जादों साननानै मेडिकेल स्टरनिफ्राय मुलिखौ लायनानै होफैदोंमोन।नाथाय उनाव गथ’नि सानाय मोननाया बारानिफ्रा बारा जायो।जायनि जाहोनाव बिखौ उदयपुर देहाफाहामसालिआव फाहामथाय होनाय जायो।बिनि देहायारि थासारिखौ साबस्रांनाय नुयैआव आहमदाबाद सिबिल देहाफाहामसालिआव लानानै थांनाय जायो। नाथाय फहामथाय होबाय थानाय समावनो इन्द्र कुमारा थांनाय 13 आगस्टनि बेलासिनि 4 रिंगाआव जोबथा हां बोयो।
पुलिसआ बुंदों नखरनि अजद होनायाव फोरोंगिरि छेल सिंनि हेंथायै एससिएसटी एक्ट आरो आयेननि दफा 302 नि गेजेरजों केसखौ थिसननानै फोरोंगिरिखौ हमनाय जाबाय।
