चीननि सान्थ्रिखौ गोख्रों फिन्नाय होनो भारतआ 28 रोजा कौटि रांआव गोख्रों हाथियार बायगोन

0
131
Indian Defence Budget for SWARM DRONE

गोदान दिल्ली, 27 जुलाइ 2022: सिमा ओनसोलखौ लानानै भारत आरो चीन सान्थ्रिनि गेजेराव दान्थे-बिदान्थे जानाया आथिखालाव गोदान बाथ्रा नङा। अदेबानि, भारत आरो चीननि गेजेराव गोलाव समनि सिमा जेंनाआ दासिम बोस्रांजायाखै। जाहोनाव सिमा ओनसोला रोखा नङैजों सम-सम भारतनि आरो चीननि सान्थ्रिनि गेजेराव गाग्लोबनो हुमखि होलायनाय आरो बुलाय-सोलाय जालायनायखौ नुनो मोनबोदों। मखनो गोनांदि, थांनाय बावैसो साननि गेजेराव चीननि सान्थ्रिआ सिमा बारनानै भारतनि ओनसोलाव आयेन बेरेखायै हाबफैनायखौ लानानै भारतनि सान्थ्रिआ बे समाव गोख्रोंसिन नोजोर लाखिगासिनो । बेबायदि समावनो भारतनि सान्थ्रिखौ आरोबाव गोख्रोंसिन खालामनो थाखाय भारत सरकारआ दिनै मोनसे गिदिर थांखि लाबावदों।

मिथिनो मोन्नाय बादिब्ला, भारत सरकारनि रैखाथि बिफाननि मन्थ्रि राजनाथ सिंनि दैदेन्नायाव DAC कमिटिआ मोनसे गोनांथार सावरायनायनि गेजेरजों चीनखौ गोख्रों फिन्नाय होनो थाखाय भारतनि सान्थ्रिनि आखायाव गोहो-गोरा हाथियार जगायनो थांखि लादों। बे सावरायनाय मेलाव थांखि लानाय बादिब्ला, रैखाथि बिफानआ गासै 28 रोजा 732 कौटि रांनि बाजेटजों भारतनि सान्थ्रिनि थाखाय गोहो-गोरा हाथियारफोरखौ बायगोन। सुलुंनि बादिब्ला, भारत सरकारआ सिमा ओनसोलाव सुथुरफोरखौ नोजोर लाखिनो आरो दबथायनो थाखाय SWARM DRONE आरो बुलेट प्रुफ जेकेटजों लोगोसे माखासे गोनांथि हाथियारफोरखौबो बायगोन। रैखाथि बिफानआ बेफोर हाथियारखौ जगायथाय होनो हायोब्ला सिमा ओनसोलाव भारतनि सान्थ्रिफोरनि गोहोआ आरोबाव गोख्रोंसिन जाबावगोन होन्ना फोरमायदों।

LEAVE A REPLY

Please enter your comment!
Please enter your name here