गोदान दिल्ली, 27 जुलाइ 2022: मुलुगनि नम्बर-1 ससियेल मीडिया प्लेटफर्म Facebook नि Co-Founder Mark Zuckerberg आ गोबां समनि उनाव मीडियानि खौराङाव थादों।बे खेबआव बियो Facebook नि मुलाम्फा एबा खहा जानायखौ लानानै खौराङाव थायाखै।नाथाय मोनसे डिलखौ लानानैसो बियो खौरां बिजोङाव थादों।जेराव बियो 3 गुन बांसिन मुलाम्फा मोनदों।
मख’नो गोनांदि Mark Zuckerberg आ सेन फ्रान्सिस्कआव थानाय गावनि लाग्जारि न’खौ 31 मिलियन डलार एबा 250 कौटि राङाव फानदों।7,000 बर्ग फुटनिफ्राय बांसिन एरियाआव बानायनाय बे न’आ बे बोसोराव सेन फ्रान्सिस्कआव फाननो हानाय बयनिख्रुइबो बांसिन बेसेन गोसासिन न’ जादों।
मीडिया रिपर्टनि बायदिब्ला , Zuckerberg आ बे न’खौ नबेम्बर दाननि 2012 माइथायाव बायदोंमोन।बै समाव बे न’नि बेसेनआ 10 मिलियन डलार एबा 80 कौटि रांमोन।10 बोसोरनि उनाव बियो बे न’खौ 3 गुन बांसिन राङाव फाननानै मुलाम्फा खामायदों।बे न’खौ 1928 माइथायाव बानायनाय जादोंमोन।
बे न’आ मिसन डिस्ट्रिक आरो जुकारबार्ग सेन फ्रान्सिस्क जेनेरेल हस्पिटाल एन्ड ट्रामा सेन्टार खाथिआव दं। Zuckerberg आ बे न’खौ Facebook नि IPO फैनायनि उनाव बायदोंमोन।कौटि रां बाहायनानै बे न’खौ बियो बानायफिनदोंमोन। Zuckerberg नाव बे न’नि अनगायै सिलिकन भेलि,लेक ताहइ आरो हवाइआव लाग्जारि न’ दंबावयो।
गुबुन फारसेथिंजाय Zuckerberg नि नेटवार्थआ दावख्लायगासिनो दं।ब्लुमबर्ग बिलियानेयार्स इन्डेक्सनि बायदिब्ला,बिनि गासै नेटवार्थआ 61.9 बिलियन डलार।बे बोसोराव फेसबुकनि सेयारा गोबां दावख्लायदों।जायनि जाहोनाव बिनि सम्पतिआ 50 जौखोन्दो खम जाबाय।इन्डेक्सनि बायदिब्ला 26 जुलाइ 2022 माइथायसिमाव Zuckerberg आ 63.5 बिलियन डलार सम्पतिखौ खोमानानै लानांबाय।मुलुगनि बयनिख्रुइबो धोनिसिन सुबुंफोरनि फारिलाइयावबो बियो दावख्लायनानै थाबाय।बे फारिलाइआव आगुआव बियो 10थि नम्बराव दंमोन।आथिखालाव बियो दाख्लायनानै 17थि नम्बराव थाहैबाय।
