उदांश्रीनि समाव भारत आरो पाकिस्ताननि गेजेराव सिमा राननाय।

0
109
Boundary division post Independence

गोदान दिल्ली,13 मे 2022: भारतआ माखासे बोसोर दावहा नांनायनि उनाव 15 आगस्ट 1947 माइथायाव इंराजनिफ्राय उदांश्री मोननो हादोंमोन।नाथाया भारतआ गावस्रानायनि दागोखौबो मोनदों।बे समाव भारतआ मोननै थुख्राआव गावस्रादोंमोन।धोरोमखौ बिथा खालामनायनि सायाव भारतनिफ्राय आलादा जानानै पाकिस्ताना दरसे गोदान हादत जायो।नाथाय दरनै हादतनि गावस्रानाया गोरलै बाथ्रा नङामोन।दरनै हादतनि गेजेराव सिमाखौ थि खालामनाय आरो बेखौ जाफुंसार होनाया गोबां जेंना गोनांमोन।

इंराजआ भारत नागारनायनि सिगां महम्मद जिन्नानि बाथ्राखौ मानिनानै 5 सप्ताह सिगां हादतखौ राननायनि बाथ्राखौ थि खालामनानै लादोंमोन।बेनि थाखाय इंराजआ सार सिरिल रेडक्लिफनि सामलायनायाव बाउन्ड्री कमिसनखौ दायो।कमिसनआव कंग्रेसनि सा 4 आरो मुस्लिम लिगनि सा 4 दैदेनगिरिफोरखौ लाफानाय जादोंमोन।बेनि उनाव कमिसनआ सिमानि सायाव सार्भे खालामनायखौ जागायजेनयो।इंराज खुंथाया रेडक्लिफनो गोबां हिन्दु आरो मुस्लिमफोर थानाय ओनसोल,गुबुन गुबुन बिथिंखौ नोजोर होनानानै सिमाखौ थि खालामनो बाथ्रा बुंदोंमोन।माखासे रिपर्टनि बायदिब्ला सिमाखौ थि खालामनाय समाव सुबुं अनजिमानि अनगायै रां-खान्थि जौगाखांनाय आरो मोजां हान्था मेलानि सोमोनदो थानायखौबो नोजोर लाखिनाय जादोंमोन।

कमिसनआ गावनि हाबा फारिखौ गोख्रैनो मावदोंमोन आरो हादतआ 15 आगस्ट 1947 माइथायाव उदांश्री जादोंमोन। उदांश्री जानाया नै सान जानायनि उनाव एबा 17 आगस्ट 1947 माइथायाव भारत आरो पाकिस्तान सिमानि बाथ्राखौ मावख’यारि महरै फोसावनाय जादोंमोन।बेखौ रेडक्लिफ लाइनबो बुंनाय जायो।सिमाखौ थि खालामनायनि उनाव सुबुंफोरनि गेजेराव हादत नागारनाय जाथाय सोमजियो।गासै 1 कौटि 40 लाख सुबुंफोरा ओरैबा हरै थांलाय फैलाय खालामो।सुबुंफोरा हादतखौ नागारनाय समाव हिंसायारि जाथाय सोमजियो।जेराव 10 लाखनिफ्राय बांसिन सुबुंफोरनि जिउआ खहा जायो।

रेडक्लिफआ गागि खौरांगिरि कुलदीप नाय्यरनो हादत बोखावनायनि जाथायखौ फोरमायदोंमोन आरो बुंदोंमोन 10-11 साननि गेजेरावनो सिमाखौ थि खालामनांगौ।गाव जिल्लानि मेप आरो बेनि माखासे बाथ्राखौ मोजाङै मोनथिजोबा।बै समाव कुलदीप नाय्यारा बिनाव लाहरखौ पाकिस्ताननो होनायनि सोमोनदैबो खौरां सोदोंमोन।अब्ला बियो बुंदोंमोन सैथो बाथ्रादि लाहराव हिन्दुनि सम्पतिआ बांसिन दंमोन।बे हिसाबै लाहरखौ भारतनो होनाय जादोंमोन।नाथाय पाकिस्ताननि बाहागोआव गिदिर गिदिर सहरा गोग्लैयाखैमोन। बेनि जाहोनावनो गाव लाहरखौ भारतनिफ्राय दिहुननानै पाकिस्ताननो गथायदोंमोन।

LEAVE A REPLY

Please enter your comment!
Please enter your name here