धुब्रि, 17 आगष्ट, 2022: धुब्रि जिल्लायाव मोनसे सोमोनांथाव जाथाइ नुजाथिदों । बान्धबपारा ओनसोलनि थागिबि गंसे सरकारि फरायसालिनि फोरोंगिरि जाकिर हुसेइनआ उदांस्रि सानखालि गावनि फरायसालिनि सा 13 बोसोर बैसोनि सासे उन्दै फरायसुलिखौ लांखारदोंमोन । नख’रनि सुबुंफोरा फरायसुलिआ न’आव फैफिनैखौ जिंगा सिनानै बान्दिहाना पुलिस थानायाव FIR होनायनि उनाव बे जाथाइया सोरांआव फैदों । FIR होनाय बायदिनो बान्दीहाना पुलिसआ बिलासिपारा पुलिसनि मददजों गोख्रों सिग्रोमनायनि उनाव उन्दै हिन्जावसाखौ दिहुनफिननो हादों । अदेबानि, दायनिगिरि फोरोंगिरिया दा जाथाइनिफ्राय खारखोमानानै दं । मिथिनो मोननाय बादिब्ला, हादरनि उदांस्रि सानखालि बान्दिहाना पुलिस थानानि बेन्दोंआव थानाय BAHIR SALMARA MV SCHOOL आव मोनसे हाबाफारि खुंदोंमोन । बे सानखालिनो बिलासिपारा आनन्दा नगरआव उन्दै हिनजावसाखौ फुस्लायनानै फोरोंगिरिआ गावनि नख’रनि सुबुंनि मइजुद्दीननि न’आव लानानै थांदोंमोन । जाथाइखौ मिथिनो मोननानै रागा जोंखांनाय पाब्लिक आरो बिमा-बिफाया खौसेयै गाग्लोबनायाव फोरोंगिरिआ उन्दै हिन्जावसाखौ लानानै खारदोंमोन । बेनि उनाव कृष्णा नगरनिफ्राय हिन्जावसाखौ मोननो हायो ।
