सोनाब बंग, 1 आगष्ट 2022: सोनाब बंग राज्योनि कचबिहारआव दिनै थांनाय हरनि समाव मोनसे दुखुनांथाव जाथाया नुजाथिदों। सुलुंनिफ्राय मिथिनो मोन्नाय बादिब्ला, शितलकुसिनिफ्राय जलपाइगुरि जिल्लानि मन्दिरसिम थांनाय लामायाव हरखाब सर्ट सार्किट जानानै सा 10 सुबुंफोरा गारिनि सिङावनो जिउ खहा जायो । बे जाथाया मिक्लिगन्ज पुलिस थानानि सिङाव थानाय डारला दालांनि साखाथियाव नुजाथिदों। जायगानि पुलिसआ फोरमायनाय बादिब्ला, दिनै थांनाय हरनि 12 रिंगायाव गंसे भेनजों गासै सा 27 भक्टफोरखौ लानानै मन्दिरसिम थांदोंमोन। नाथाय पिकआप भेनआव थानाय जेनेरेटरनि इलेकट्रिक लाइनआ हरखाब सर्ट सार्किट जायो। जाहोनाव सा 10 सुबुंफोरा जायगायावनो जिउ गोमायो आरो सा 16 सुबुंफोरा जोखोम जायो। जोखोम जानाय सुबुंफोरखौ जलपाइगुरिनि देहा फाहामसालियाव थाबैनो थिसन्नाय जादों।

जायगानि सुलुं बादिब्ला, गारियाव जेनेरेटरजों लोगोसे DJ दामनानै रंजा-बाजा थांबाय थानाय समावनो जेनेरेटरनि इलेकट्रिक लाइनआ हरखाब सर्ट सार्किट जायो आरो बे हरखाब जाथायनिफ्राय रेहाइ मोनैजों सा 10 सुबुंफोरा जिउ गोमायो। जाथायाव जिउ गोमानाय सुबुंफोरखौ शितलकुसि ओनसोलनि होन्नानै मिथिनो मोन्दों । बे जाथायनि सायाव गुबै बाथ्राखौ मिथिनो हायैजों दासान्दि जायगानि पुलिसआ संदान्नायखौ सोलिहोगासिनो दं होन्ना पुलिस बिबानगिरिया फोरमायदों।