गोदान दिल्ली, 10 जनु 2022: आमेरिकाआव गंसे सान्थ्रिनि उरां जाहाजआ जाब्रबथाय जादों। बे जाब्रबथाया केलिफर्नियानि बालाबारिआव जादों। जाब्रबथाय जानाय समाव उरां जाहाजआव सा 5 सुबुंफोरा गाखोदोंमोन। बिसोर गासिबो सुबुंफोरनि जिउया खहा जाबाय।
मेरिन करआ जाब्रबथाय जानायनि सानसे उनाव मीडियानो बेनि खौरांखौ होदों। जायगानि मीडिया रिपर्टनि बायदिब्ला, एमवी-22 बी अस्प्रे उरां जाहाजआ सा 5 सुबुंफोरखौ लानानै बुधबाराव ग्लेमिसनि खाथिआव थानाय इम्पेरियेल काउन्टीनि मोनसे ओनसोलनिफ्राय बिरदोंमोन।
उरां जाहाजआ सेन डिएग फारसे बिरलांनांगौमोन, जाय ग्लेमिसनिफ्राय 185 गोजानआव दं। मेजर मेसन इंग्लाहार्टआ फोरमायदों लामायाव हरखाबै बे उरां जाहाज जाब्रबथाय जानायनि मैहुर जानाङो। एमवी-22 बी उरां जाहाजआ सेन डिएगआव थानाय मेरिन कर एयार स्टेशन मिरामरनिमोन।
एमवी-22 बी उरां जाहाजआव डाबल इन्जिन थायो आरो बेयो हेलिकप्टार बायदिनो बिरनो आरो बाग्लायनो हायो। मेरिन कर नेभि आरो अख्रांमा सान्थ्रिआ बे रोखोमनि उरां जाहाजखौ सामलायो। कामान्डिं मेजर जेनेरेल ब्रेडफर्ड जे. गेरिंगआबो बे जाब्रबथायखौ लानानै फिनजाथाय होदों आरो जाब्रबथाय जानायाव सा 5 सुबुंफोरनि जिउ खहा जानायाव दुखु मोननाय फोरमायो।
