दिल्लि, 16 आगष्ट, 2022: भारत हादरा 76थि उदांश्री सानखौ रंजा बाजायै फालिदों । रंजानायनि सानाव दुखुनि थासारिखौबो दिनै नुनो मोन्दों । मानोना हादरनि रैखाथि हान्जा ITBP नि सा 6 फाइखिफोरा हरखाबै जिउ गोमानो गोनां जादों । बेनि अनगायैबो गोबां जखम जादों होन्नानै मिथिनो मोन्दों । बे दुखुनांथाव जाथाइया जम्मु आरो काश्मीरआव जादों । मिथिनो मोन्नाय बायदिब्ला ITBP नि फाइखिफोरखौ गंसे बासजों रोगागासिनो दङमोन । बे समावनो लामायाव बासआ जाब्रबथायजों मोगा-मोगि जायो आरो बासआ मोनसे दैमानि सेराव गलाङो । जाहोनाव ITBP नि सा 6 फाइखिफोरा जायगायावनो जिउ गोमानो गोनां जायो । आरो गोबां फाइखिफोरा जखम जानो गोनां जायो ।
मिरुनि नखर मन्थ्रि अमित साहआ बे दुखुनांथाव जाथाइखौ मिथिनो मोन्नानै गोथौ दुखु मोन्नायखौ फोरमायो आरो जिउ गोमानाय सान्थ्रिफोरनि जिउमानि थाखाय इसोरनि सेराव आरज गाबो । बे दुखुनांथाव जाथाइया जम्मु आरो काश्मीरनि फाहालगाम होन्नाय थावनियाव सोमजिदों । सुलुंनि रिपर्टनि बायदिब्ला गासै सा 37 ITBP नि फाइखि आरो सा 2 फुलिस फाइखिफोरा जाब्रबथाइ जानाय बासजों दावबायदोंमोन । बे जाब्रबथाइखौ गारिनि ब्रेकआ गाज्रि जानायनि थाखायनो सोमजिदों होन्ना मिथिनो मोन्दों । जायनि जाहोनाव 200 पुट गोजौनिफ्राय बासआ गलाङौ ।
