गोदान दिल्ली,15 आगस्ट 2022: गाहाय मन्थ्रि नरेन्द्र मदिआ भारत उदांस्रिनि 76थि बोसोरारि सानआव लाल किल्लाआव 9थि खेब फिरफिला बिरहोदों।बेनि उनाव गाहाय मन्थ्रि नरेन्द्र मदिआ हादतनि नोगोरारिफोरखौ सोमोनदो लादों।
गाहाय मन्थ्रि नरेन्द्र मदिआ लाल किल्लानिफ्राय नोगोरारिफोरखौ सोमोनदो लानानै बुंदों गेना खान्थिआ हादतखौ उरि बायदि जाख्लदों।बेनि थाखायनो गेना खान्थिखौ मुगैनांगौ।नखरबाद राजखान्थिजोंबो हादतआ खहा जादों।राजखान्थिजों लोगोसे हादतनि फसंथाननिफ्रायबो नखरबादखौ बोखारनानै होनांगौ।हादतनि थाखाय मोननै गिदिर चेलेन्स दं।गिबि चेलेन्सआ जादों गेनाखान्थि आरो नैथि चेलेन्सआ जादों बिदा फंबाय-बियादैबाद आरो नखरबाद(राजखान्थि दोलोआव नखरनि सुबुङा सासे उनाव सासे फैनाय)।
गाहाय मन्थ्रि नरेन्द्र मदिआ मोनसे स्लगान होनानै बुंबावदों आगुनि बारग’ गाहाय मन्थ्रि लाल बाहादुर शास्त्रीआ जय जवान,जय किसाननि स्लगान होदोंमोन ।बे स्लागानजों बारग’ गाहाय मन्थ्रि अटल बिहारी बाजपेयीआ जय बिगियानखौ सरजाबदोंमोन।गाहाय मन्थ्रि नरेन्द्र मदिआबो बे स्लगानजों जय अनुसंधानखौ सरजाबदों।
गोबाव सम थांनानै थानो थाखाय इनबेसनआ गोनांथार।हादतआ 5जी फारसे आगान सुरलांगासिनो दं।डिजिटेल क्रान्तिजों गोदान मुलुगआ जाखांबोदों।मुलुगआ हलिस्टिक हेल्थकेयारनि बाथ्राखौ बुंदों। गाहाम देहानि बाथ्राखौ सावरायनाय जायोब्ला मुलुगआ भारतनि यग आरो आयुर्बेदिक फारसे नोजोर बोयो।भारतआ गाहाम देहानि बे मोननै सम्पदखौ मुलुगनो होदों।
भारतनि लाइमोनफोरा गोदान गोदान संदाननानै मुलुगनि सिगाङाव दिन्थिदों।गोसोनिफ्राय मावनो हायै साननायखौ जानगार खालाम नांगौ।जों जोंनि मावनो हानाय गोहोनि सायाव फोथाय नांगौ।जेब्ला जों फारफ्रामबो बिथिङाव जौगाखांगोन अब्ला मुलुगनि जेंनाखौ सुस्रांनो हागोन ।
आत्मानिर्भर भारतआ (गावनि आथिङावनो गाव गसंनाय) गासिबो नोगोरारि, गासिबो सरकार ,समाजनि मोनफ्रामबो फसंथाननि बिबान। आत्मानिर्भर भारतआ सरकारि एजेन्डा एबा सरकारि हाबा फारि नङा।बेयो समाजनि सुबुं जांख्रिखांनायसो।जायखौ जों इयुनाव आवगय होलांनांगोन।
भारतनि लाइमोनफोरा फैलाव अख्रांमानिफ्राय लानानै लैथोमानि गोथौसिम रिसार्च खालामनो थाखाय थोजासे बिबांनि मदद मोननो हायो,बेनो जोंनि नाजानाय।बेनि थाखायनो स्पेस मिशन आरो Deep Ocean Mission खौ बांहोनाय जादों।फैलाव अख्रांमा आरो लैथोमानि गोथौआनो जोंनि इयुननि थाखाय गोनांथि सम्पद।
सम सम नुनो मोननाय जायोदि जोंनि टेलेन्टआ गावनि हारिनि बेंखनथायावनो थाबाय थायो।बेबायदिआ गोसो गुसेबनि नेरसोन।आथिखालनि गोदान मुगाआव जों गासिबो हारिनि रावनि सायाव गौरबखौ मोनदांथिनांगौ।
लाल किल्लानिफ्राय हादतनि नोगोरारिफोरखौ सोमोनदो लानानै गाहाय मन्थ्रि नरेन्द्र मदिआ बुंबावदों आयजोफोरखौ अपमान खालामनायखौ सहायनाय जानाय नङा। जेब्ला सुबुंफोरा जिंगा सिङो अब्ला यगखौ गोसोखाङो।हादतआव गोदान सोलोंथायनि नेम-खान्थिखौ बानायनाय जादों।जायखौ गोबां गोथौयै सावरायनानै बानायदों।मुलुगा दिनै आबहावा गुबुंले जानायजों बुगिनांदों।मुलुग दुंखावनायखौ सुस्रांनो हानाय लामाआ भारतनाव दं।
फैगौ 2047 माइथायाव भारत उदांस्री जानाय 100 बोसोर फुरा जागोन। बेनि थाखायनो फैगौ 25 बोसोराव मोनबा समाय खिरा लानायखौ फुरा खालामनांगोन।सेथिआ जादों जौगाखांनाय भारत , नैथिआ जादों गोसो गुसेब साननायखौ नागारनाय,थामथिआ जादों जोंनि सम्पदनि सायाव गौरबखौ मोनदांथिनाय,ब्रैथिआ जादों खौसेथि आरो बाथिआ जादों नोगोरारिफोरनि मावनो गोनां बिबान।
भारत उदांस्रि जानाया गोबां बोसोर जानायनि उनाव मुलुगआ भारतनि फारसे नोजोर होनायखौ सोलायदों। मुलुगआ भारतखौ गौरब आरो आसा खालामाय महरै नोजोर बोदों।जेंनाखौ सुस्रांनो हानायनि लामाआ भारतआव दं ।बे बाथ्राखौ मुलुगा सं दानगासिनो ।
गाहाय मन्थ्रि नरेन्द्र मदिआ बुंबावदों करना महामारिनि समाव मुलुगआ भेक्सिन थुजानायखौ लानानै गोनो गोथो जाबाय थादोंमोन।बे समाव भारतनि सुबुंफोरा 200 कौटि ड्रप भेक्सिन थुजानानै मुलुगखौ गोमो होदोंमोन।
भारतआ सुबुं खान्थिखौ जोनोम होगिरि ।जायनि गोसोआव सुबुंखान्थिनि फारसे साननाय दं ,बियो मुलुगनि गिदिर गिदिर खुंथायखौ सोमावग्लुंनो हायो।
